அத்தியாயம் ஐந்து - அடுத்த நாள் 
இதற்கு மேலே செல்கிறார்கள் . புளொமின்டன் " லுக் அவுட் " , என்கிற அதிகமான மலையின் உயரப் புள்ளி வருகிறது . அதிலிருந்து கீழ் நோக்கி அதிகளவு சரிவைப் பார்க்கலாம் . கண் கொள்ளாக் காட்சிகள் கண்களை நிறைக்கின்றன . அதிலிருந்து பார்த்தால் கஸ்பி நிலங்களையும் பார்க்கலாம் என்றால் இன்னொரு புறத்தில் இவர்கள் இருக்கிற வீடும் இருக்க வேண்டும் . சற்று செல்ல சிவப்பு மண் சுவருடன் பள்ளத்தில் இறங்கிற கடற்கரை . ஓரிரு மரங்களின் வேர்கள் சிறிது வெளியில் தெறிய முக்கால்வாசி வேருடன் சுவர் மண்ணுடன் நிற்கிற மரங்கள் . மண்ணை அரித்தாலும் சரிந்து விழாது உறுதியாகக் கிடக்கிற மண்ணாகக் கிடக்க வேண்டும் . நம்மூரில் என்றால் மரம் சரிந்து விழுந்திருக்கும் . மண்ணும் தான் . அப்படி கரை தோறும் அங்காங்கே கடற்கரைகள் இருக்கின்றன .
அவ்விடத்தில் தான் அதிகபட்ச உயர் அலைகள் அடிப்பதாகவும் கூறப்படுகிறது . அந்த தீவின் நில மட்ட உயரங்களைப் புரிந்து கொள்ள சிரமப் படுகிறான் . நில அளவையியல் அறிவு அவசியம் தேவைப்படுகிறது . தில்லைக்கு தட்டுத் தடுமாறிய ... நிலையிலே கிடக்கிறது .
கடலுக்குள் நீட்டிக் கொண்டிருக்கிற துண்டு நிலப்பரப்பில் இருக்கிற பசுமைக் காட்டினுள் ஐந்து கிலோ மீற்றர் , பத்து ...என அதிக தூரம் நடக்கிற சுற்றுக்கள் இருக்கின்றன . நானும் பிள்ளைகளும் நடந்திருக்கிறோம் " என்கிறாள் பூமலர் . " பூச்சிகள் ...மலை ஏறுவது போல நடக்க முடியாது " என ஜெயந்தி கூற அதை தவிர்த்து விடுகிறார்கள் . ஆனால் , கடற்கரை அழகாகவேக் கிடக்கிறது . " கல்லை அலை அடித்து குகையை ஏற்படுத்தி இருக்கிறது எல்லாம் மேலே செல்ல தான் வருகிறது . நீருக்கு நடுவே சிற்பி போல செதுக்கிய உருவங்களும் கிடக்கின்றன " என்று விபரிக்கிறாள் பூமலர் . நீரும் லேசு பட்டதில்லை .
மேலே ஏறி தேனீரையும் ...கொண்டு வந்ததையும் சாப்பிடுகிறார்கள் . இவர்கள் நடந்த ஈர மண்ணை நீர் வந்து மூடி இருக்கிறது . ..நீர் வந்து அபகரித்து விடுகிறது . ஆனால் , திரும்ப விட்டு விட்டு போகிறதல்லவா . நிலையற்ற நிலவுரிமையை ஜனநாயக பண்புடன் பார்த்தால் ... எவ்வளவு நல்லாயிருக்கும் . தீவுமகள் மகிழ்ந்தல்லவா போய் விடுவாள் .
'கலோவீன்' என்கிற ஒரு கொண்டாட்டம் இங்கே இருக்கிறது . அது உண்மையிலே கல்லறையிலே உள்ள முன்னோர்களுக்கு வைக்கிற (பார்டி ) விருந்து என்றே சொல்கிறார்கள் . தீபாவளிக்கும் இதற்கும் தொடர்பு இருக்கிறதாக... தில்லை வாசிச்சிருக்கிறான் . முன்னோருக்கு படைத்து ஒளியேற்றி சந்தோசப்படுத்துவது தான் அடிப்படை . முதல் மனிதர் கொண்டாடிய ஒரு நிகழ்வைத் தான் ...தத்தமது கற்பனைகளுடன் இன்று பலரும் கொண்டாடி வருகிறார்கள் .
ரஸ்யாவிலிருந்து ..... தான் இதை 'சோம்பி'யாக கற்பனை பண்ணிறது ஏற்பட்டிருக்கிறது போல இருக்கிறது . கடுங்குளிர் . இருண்ட சதுப்புக் காடுகள் . நம்மூரிலும் காடுகளில் ...உருவங்கள் நடமாடுவதாக பிரமைகள் உண்டு . அமெரிக்க ..சினிமா இதை பிரபல்யப்படுத்தி இருக்கிறது . அதை உலகம் எடுத்துக் கொண்டு விட்டிருக்கிறது . கலிங்கத்துப்பரணி என்கிற இலக்கிய நூலிலும் .... இடம் பெறுகிறது 'சோம்பி'யாகவே இருக்க வேண்டும் . இன்றைய மனிதர்கள் அதில் உள்ள நன் நோக்கை விட்டு விட்டு கொடூர பார்வையைப் பார்க்கிறார்கள் போல படுகிறது . ஈழத்தில் , சிங்களவர் , தமிழரை சோம்பியாக அல்லவா அலைய விட்டிருக்கிறார்கள் . மாற்றி விட்டார்கள் . அது தான் வருத்தமளிக்கிறது .
அனபொலி கோட்டை
கடற் கொள்லையருடன் வந்த பிரெஞ்சுக்காரர்கள் , அனபொலியில் மிக்மக் பழங்குடியினர் வளப்பமாக வாழுவதை , விவசாயம் செய்கிறதைப் பார்த்தார்கள் , அனபொலி கணவாய் மண் நெல் போன்ற தானியங்களிற்கு வளமானதில்லை . பழமரங்களுக்கே ஏற்றது .பெருமளவில் அப்பிள் இங்கே இயற்கையாகவே விளையிறது . இராணுவம் நிச்சியமாக தன் நடத்தையைக் காட்டாமல் இருந்திருக்காது .அவர்களின் நிலத்தை பறித்து பிரெஞ்சு மக்களுக்கு கொடுத்திருக்கும் . பிளேக் போன்ற நோய்களால் நிறைய பழங்குடி மக்கள் இறந்தனர் என்கின்றனர் . எனவே பாலியல் தொடர்புகளுடாகவும் கொடுமைகள் நிகழ வாய்ப்பு இருக்கின்றன . எத்தனை கிரிசாந்தி , எத்தனை இசைப்பிரியாக்களோ ? . சரித்திரம் தணிக்கை செய்து தானே எழுதப்படுகிறது . குற்றவாளிகளையும் " ஹீரோ" என்று தானே புகழ்கிறது . பிரெஞ்சுப்படையினரின் ஒரு தண்டனை முறையைப் பாருங்கள் . பீரங்கியின் வாய் முனையில் ஒரு ஆளைக் கட்டி விட்டு சிதற சுடுறது . பிரிட்டன ,பொது வெளியில் துடி , துடிக்க ஆளை தூக்கில் போட்டு மகிழ்கிறது . பிரிட்டனின் முறையே சிறந்தது என்ற ஒரு பார்வை இருக்கிறது . நாகரிகம் மயக்குகிறது . " நாலு நாள் ...சட்டமாக வைத்திருந்தால் ஐந்தாம் நாள் இயல்பாகி விடுகிறது . ஏன் அதிகாரத்தை வழங்காதிருக்கிறார்கள் ? . ஜனநாயக உரிமை எல்லாம் பறிக்கப்படுகிறது ? புரிகிறதா ? " என்று சொல்லி தில்லையின் நண்பன் கதிர் குறும்பு விடுவான் . பிரிவினை பேசுறது ; பயங்கரவாதம் எல்லாம் அந்தக் கால ராஜதுரோகக் குற்றங்கள் . இந்தக்கால தவ்வல்கள் கூட எல்லாம் தெரிந்தது மாதிரி பேசுகிறார்கள் . இந்த நாட்டுக் குடிமகனுக்கு ஒரு மாகாணம் கூட கிடையாது . ஏன்? அது சிறு வெடிப்பு . கற்பனை செய்து பார். வெடிப்பு பரவி , பரவி ...இந்த கண்டம் முழுதுமே கடைசியில் சொந்தக்காரர் கையில் போய் விடுகிறது .... பீத்தல் பயம் " கதிர் அடங்க மாட்டான் . " சூரியனை தலைவனாக கடவுளாக கொண்டாடுறதில் நியாயம் இருக்கிறது " .இப்படியே அலட்டிக் கொண்டு போவான் . சிரிக்க , சிந்திக்க ..என எடுத்துக் கொள்ள வேண்டியது தான் . இந்தச் சிங்கள இனமும் தமிழ் மண்ணில் குசாலாக குந்தி இருக்கிறது . எவ்வளவு காலம் இருக்கும் என்பதையும் தான் பார்ப்போம் . " நீங்கள் அத்தனை பேரும் உத்தமர் தானா சொல்லுங்கள் . உங்கள் ஆசை நெஞ்சில் கையை வைத்துச் சொல்லுங்கள் ! " . புத்தர் இந்த கோதாரிப்பிடித்த ஆசையை தானே விடு என்று சொல்லி போராடியிருக்கிறார் . யார் கேட்டார்கள் ? .
பிரெஞ்சுப் புரட்சியின் போது கில்லட் கத்தி (மருத்துவரின் சத்திரச்சிகிச்சை கத்தியைப் பார்த்து வடிவமைக்கப்பட்டது )வெட்டும் தண்டனை முறையைப் பார்த்து அரச குடும்பங்களே பதறிப் போயின . பிரெஞ்சு அரச குடும்பமும் இம்முறையாலே கொல்லப்பட்டனர் . அரபுநாட்டினரின் தண்டனை முறை வேறு விதமானது . அது இன்னும் பயங்கரமானது , அதை விடுவோம் . நோவாகோர்ஸியா முழுதும் பிரெஞ்சு மக்கள் பரவி வவசாயப் பண்ணைகளை ஏற்படுத்திக் கொண்டனர் . அனபொலி தான் பிரதான பகுதி . தலைநகர் பகுதி . ஃபண்டி வளைகுடாவில் , பழங்குடி மக்கள் அனபொலி பேசினிலும் , மினாஸ் பேசினிலும் அதிகளவில் சமண் மீன்களையும் வேறு பிடித்து வந்திருந்தார்கள் . அதுவும் பிரெஞ்சுக்காரர் கைற்கு மாறின . ஒரு சமூகத்தின் சாவிலே இன்னொரு சமூகம் வாழ்கிறது ,எழுகிறது . இந்த விதி மாற வேண்டும் . மாற்றப் பட வேண்டும்.
சமண் மீனின் . வாழ்க்கை வட்டம் விநோதமானது . முட்டை இட நன்னீருக்குச் செல்கின்றன . இருவகை நீரிலும் வாழக் கூடிய மீன் இனம் . கடலை நோக்கி ஓடி வரும் நதி திரும்பி ஓட முடியாதவை . எனவே நதி அகண்ட பெரிய நதியாக ஒன்றில் இருக்க வேண்டும் . உயர் அலையின் போதே நதி ஓட்டம் திரும்பி ஓட வாய்ப்பு இருக்கிறது . பெற்றோர் மீன்கள் அங்கேயே இருந்து இறந்து விடுவதாகவும் கூறப்படுகிறது . பெருகிய குஞ்சுகள் நீந்தி தேக்கத்திற்கு வருகின்றன . முட்டை இடும் காலத்தில் இவையும் ... நன்னீரிற்குச் சென்று முட்டைகளை இட்டு , அதே வட்டத்தைத் தொடர்கின்றன . தற்போது குடியிருப்புகளாலும் , தொழிற்சாலைகளாலும் இந்நதிகள் அசுத்தப்படுவதால் ..... சமணின் விளைச்சல் அரைவாசிக்கு மேலே குறைந்து போய்க் விட்டிருக்கிறது . எச்சரிக்கை சமிக்ஞைகள் விடப்பட்டுக் கொண்டிருக்கின்றன . கனடாவில் நிறைய சுத்திகரிப்பு நிலையங்கள் எழுந்தவாறிருக்கின்றன . இது பாறைத் தீவு . அமைத்து , செயல்பட வைப்பது எல்லாமே கஸ்டமாக இருக்கிறது . எப்படியோ சமாளிக்கிறார்கள் போல இருக்கிறது . இல்லை அழிய விட்டுக் கொண்டிருக்கிறார்களோ ? இயற்கையை காப்பாற்றுறோம் என்று அழித்து கொண்டு தானே இருக்கிறார்கள் . பேசுவது ஒன்று ; செய்வது ஒன்று . இந்தக் குணம் இலங்கையருக்கு மட்டுமில்லை எல்லாருக்கும் இருக்கின்றது .
இங்கே நதியில் உயர் , தாழ் மின்சாரப் பிறப்பி (நிலையம் ) ஒன்றையும் கூட அமைத்திருக்கிறார்கள் .
கியூபெக் மாநிலம் பிரிட்டனின் கையில் வீழ்ந்த பிறகு பிரெஞ்சுகாரர்களின் கை ஒடிந்து போய் விடுகிறது . அம்மினிசன்கள்(துவக்கு குண்டுகள் ) அத்திலாந்திக் கடல் மூலமாக பிரான்ஸ் அனுபுறதில் சிரமத்தை அடைகிறது . புயல்கள் வேறு . இத்தீவைச் சுற்றி நிறைய கப்பல்கள் சிதைவுகள் இன்னம் கூட எடுக்கப்படாது கடலுக்குள் கிடக்கின்றன .
அனபொலிக் கோட்டை பிரிட்டனின் கையில் வீழ்ந்து போனது . பிரெஞ்சுப் படையின் நெஞ்சில் அந்த தோல்வி கனன்று எரிந்து கொண்டேயிருந்தது . பின் வாங்கி மினாஸ் தேக்கத்தின் அயலில் ஆன் கோட்டையைக் கட்டிக் கொண்டு தரித்து நிற்கிறது . அனபொலி சுற்றயலில் பிரெஞ்சுக்குடிகள் இருந்தன , பிரெஞ்சுத் துருப்புகள் அவர்களுள் ஊடுருவி அதிகாரிகளைக் கடத்துறதும் , கொலை செய்றதும் , கோட்டையைத் தாக்குறதுமாக நித்திய தலைவலியைக் கொடுத்துக் கொண்டே இருந்தன . கடைசியில் ஆன் கோட்டையும் கைப்பற்றப்பட்டு விடுகிறது . இது நிகழ சுமார் ஏழாண்டுகள் வரையில் போர் நிகழ்ந்திருக்கிறது . கனடாச் சரித்திரம் " ஏழாண்டுப் போர் " என்று குறிப்பிடுகிறது . பிரெஞ்சுக் குடிகள் இருந்தால் மேலும் அபாயம் . ஊடுருவி தாக்குவார்கள் என்ற அச்சத்தில் பிரிட்டன் நோவாகோர்ஸியாவிலிருந்த 6000 இற்கு மேற்பட்ட பிரெஞ்சு மக்களின் பிரஜாவுரிமையை உடனடியாக பறித்து ( சில நாள்களில் ) வெளியேறி விட வேண்டும் " என்று கடுமையாக கட்டளை இட்டு விட்டது . இலங்கை மலையக மக்களின் பிரஜாவுரிமை பறித்திற்கு இது தான் முன் மாதிரி . ஒருவேளை மலையகத்திலும் பிரிட்டனே பின்னால் நிற்கிறதோ என்று தில்லை சந்தேகிக்கிறான் . தமிழர் பிரச்சனை பல்வேறு பரிமாணங்களைக் கொண்டது .
வெளியேற்றத்தில் மக்களுக்கு எந்த வித உதவிகளையும் செய்ய முன் வரவில்லை என்ற விமர்சனமும் இருக்கின்றது . அபாயகரமான அத்திலாந்திக் கடல் வழியே வெளியேற வேண்டியிருந்து . சுயமாக மூட்டை கட்டி நடந்து குழந்தைக் குட்டிகளுடன் மிகுந்த மனக்குமுறலுடன் பிரிய முடியாது பிணைக்கப்பட்ட விவசாயப் பண்ணைகளையும் விட்டு கண்ணீர் மல்க இடம் பெற்ற பிரெஞ்சு அகாடியரின் இடப்பெயர்வு பெரும் துயரகரமானது . இவர்களுடைய நிலத்தை கனடாவில் குடியேறி இருந்த ஸ்கொட்லாண்ட் வழி வந்த அகாடியர்களிடம் கொடுக்கப்பட்டிருக்கிறது . களவாக அங்கே நின்று தம் நிலத்திற்குப் போனவர்கள் நிலம் பறிபோய் இருப்பதை பார்த்து மனம் வெதும்பி இருக்கிறார்கள் .
வாகனத்தில் பல திருப்பங்களுடனான வீதிகளில் பயணித்து விவசாய நிலங்களைப் பார்த்து வருகிற போது பூமலர் , " நாளை , இங்கே இருக்கிற காஸ்பி வைனரி வயலுக்கு போகலாம் . அவ்வயலிலே இருக்கிற உணவகத்தில் சாப்பிட்டு பிறகு , அங்கேயே இறங்கி திராட்சை தோட்டத்தில் நடந்து பார்ப்போம்( விடுவார்கள் )" என்றாள் . வெளிநாட்டுக்காரர்களே பெரிய வைன் குடியர் . கஸ்பி என்ற இப்பகுதியில் பெருமளவு திராட்சையே வைத்திருக்கிறார்கள் . சூரியக்காந்திப் பூ வயல்களும் இருக்கின்றன .
கயூன் நாடு
பிரெஞ்சு அகாடியர்கள் இடம் பெயர்ந்த லூசியான மாநிலத்தில் (அச்சமயம் பிரெஞ்சுக் காலனி ) கயூன் என்ற பெயரில் குட்டி நாட்டை (டவுணை ) ஏற்படுத்தி இருக்கிறார்கள் . நாம் மாலைதீவில் ஒரு தீவை ஈழநாடு என ஏற்படுத்த விரும்பியது போல ...ஒரு கோபம் , ஒரு தளம் . அங்கே நோவாகோற்சியாவிலிருந்து இடம் பெயர்ந்த சோகத்தை , வலிகளை சேகரித்த பிரமாண்டமான அரும்பொருட்காட்சியகம் ஒன்று இருக்கிறது . அங்கே இவாஞ்ஜிலின் , தேவதையாகவும் , ராணியாகவும் சிலைகளாக .... நிற்கிறாள் . ஆங்கிலேயர் ராணியை வழிபடுறவர்கள் . அதனால் தான் ... ராணியாகவும் அவளுக்கு ஒரு சிலை . ஏழை ராணி . ( யானை மாலை போட்டதாலே ஆள வந்த ராணி போல அதிருஸ்டக்காரப் பெண் )' கயூன் ' க்கு என்ன அர்த்தம் ? . நோவாகோர்ஸியாவை பிரெஞ்சுகாரர் அழைத்த பெயரோ ? தெரியவில்லை . அன்று , லூசியான மாநிலத்தை பிரெஞ்சுக் காலனியாக ஆங்கிலேயர் ஏற்றிருக்கவில்லை . ஆனால் , அவர்கள் கையில் தான் இருந்தது . இவர்களை யார் கேட்டார்கள் ? . காலத்திற்கு காலம் ஒவ்வொருவர் பொலிஸ்காரராக நிற்க முயல்கிறார்கள் . யாழ்ப்பாணத்தில் சிங்கள பொலிஸ் நிற்கிறது .
பிறகு , அம்மாநிலத்தை நெப்போலியன் அமெரிக்காவிடம் கொடுத்து விட்டதாக ,வித்ததாக ...கேள்வி . பிரிட்டன் அங்கே , கனடிய பழங்குடியினருக்கு என்று ஒரு மாநிலத்தை ஏற்படுத்திக் கொடுக்க நினைத்திருந்தார்கள் . அந்த சிந்தனையும் அதோடு மடிந்து விட்டது . கனடா , முதல் குடியினர் என அழைக்கத் தொடங்கியதுடன் அவர்கள் பிரச்சனைக்கு முற்றுப் புள்ளியும் வைத்து விட்டது . அதிகாரப் பரவலாக்கமற்ற , ஒப்பந்தங்களுடனான சலுகைகள் , வசதிகள் ...என்ற வகையில் தான் இன்றும் பழங்குடியினர் பிரச்சனைகளை அணுகுகிறார்கள் . அப்படி இருக்கிறதாலே அக்குடியினரின் குழந்தைகள் , சிறுவர்கள் கொன்று புதைக்கப்பட்டது , நிறைய இளம் பெண்கள் குலையுண்டு போய் இருப்பது ,சீரழிவுகள் ஒப்பேறுகின்றன . இலங்கையில் இனப்படுகொலை .இது கலாச்சாரப் படுகொலை என அழைக்கப்படுகிறது . மனித உரிமைப் பிரச்சனையில் இந்நாடும் சிக்குப் பட்டே கிடக்கிறது .
இங்கே எவ்வளவு பெரிய நிலம் இருக்கிறது . ஒன்ரோரியா மாநிலமே பெரிய நாடு போன்றது . அதில் பல ஐரோப்பிய நாடுகளையே அடக்கி விடலாம் . கொடுக்கிறதுக்கு மனமுமில்லை . பிரிட்டனில் ஸ்கொட்லாண்ட் யார்ட் பொலிஸ் பேர் பெற்றது . இங்கே நிகழ்ந்த பெண்களின் தொடர்க் கொலைகளை கண்டறிய அவர்கள் உதவியை நாடலாம் . வெளிக்கு கனடா , அவுஸ்ரேலியா என்று அழைக்கப்ப்பட்டாலும் இவை பிரிட்டனின் மாநிலங்கள் தாம் . அந்த சிந்தனை இல்லை . இங்கிருப்பவை சிஸ்டம் பிழை , சிஸ்டம் பிழை என்ற பல்லவியையே பாடிக் கொண்டிருக்கின்றன . பிரிட்டன் , இந்தியாவையும் மாநிலமாக வைத்திருக்கவே விரும்பியது . அரசகுடும்பத்தால் தான் சுதந்திரம் வழங்கப்பட்டது . காந்தியும் நேரத்தை வீணடிக்காது பாகிஸ்தான் என்று துண்டாடிக் கொடுத்த போதிலும் ஏற்றுக் கொண்டார் . அது ஜின்னாவால் ...பிரிக்கப்படவில்லை . பிரிட்டனாலே நடைபெற்றது . பிரிவினை இந்தியாவிற்கு இன்றும் தலைவலியைக் கொடுத்துக் கொண்டே இருக்கிறது . இவர்களைப் பார்த்து இலங்கையும் ஈழப்பிரச்சனைக்கு முற்றுப் புள்ளி வைக்க பல வழிகளை கையாண்டு வருகிறது . ரஸ்யா , உக்ரேன் பகுதிகளை தன்னோடு சர்வசன வாக்கெடுப்புடன் சேர்த்துக் கொண்டதுடன் ....பிரச்சனைக்கு முற்றுப்புள்ளியும் வைத்து விட்டது . முட்டாள் உக்ரேன் அரசுக்கு தான் இன்னமும் புரியவில்லை . உலக விதிகள் விளங்கவில்லை . இனி எதைப் பற்றிக் கதைக்கப் போறார்கள் . இந்த விதிப்பிரகாரம் தான் போக்லாண்ட் தீவு , பிரிட்டனுக்கு சொந்தமானது , கரிபியன் தீவுகள் , மெக்சிகோப் பகுதிகள் அமெரிக்க மாநிலமானது , பல தீவுகள் பிரெஞ்சு மாகாணமானது . பெரிய நாடுகள் எப்பவும் சிறிய நாடுகளை முட்டாளாக்கிக் கொண்டு தானிருக்கிறது . இலங்கை , உக்ரேன் ....போன்றன பலிக்கடாகள் .
கனடாவில் பழங்குடியினருக்கு என கொடுக்கப்பட்ட நிலப்பகுதிக்கு அருகில் எல்லாம் ஆங்கிலேயருக்கான சிறிய டவுண் ஒன்றும் இருக்கிறது . அவர்களுக்கு தான் அரச அதிகாரங்கள் . இவர்களுக்கு இல்லை . இவர்கள் அதில் சேரலாமா , இல்லையா ? தெரியவில்லை . மத்திய அரச பகுதியில் உயர் அதிகாரிகளாக நியமிக்கப்பட்டு வருகிறது இடம் பெற்று வருகிறது . கனடா , ( காந்திஜி " ஹரிஜன்கள்" ( கடவுளின் குழந்தைகள் ) என அழைத்தது போல) இவர்ககளையும் அழைத்து வருகிறது . இவற்றை பாராட்டவே வேண்டும் . இப்ப தான் இவர்களுக்கென தனித்துவமான பொலிஸ் ஸ்டேசன்களை திறக்க வேண்டுமென சிந்திக்க தொடங்கி இருக்கிறார்கள் . அடுத்த அரசியல் கட்சி ஆட்சிக்கு வருகிற போது இவர்களுடைய திட்டங்களை எல்லாம் குப்பைக் கூடைக்குள் எறிந்து விடும் . எழுத்தாளர்கள் இவர்களைக் குறித்து மேலும் ஆய்வுக்கட்டுரைகளை எழுதி வரல் வேண்டும் . தமிழ்ப் பத்திரிகைகளிலுமிவர்களுக்கென தினகரனில் குறிஞ்சிப்பரல் பகுதி போல ஒரு தனி பகுதியையே , நிகழ்ச்சி நிரலையே ..ஏற்படுத்த வேண்டும் . இவர்களின் அனுபவங்களும் எமது விடுதலைக்கு தேவை .
கஸ்பி திராட்ஸைத் தோட்டம்
யாழ்ப்பாணத்தில் பணப்பயிரான புகையிலை வைத்தது போல அனபொலி கணவாயில் கஸ்பி பகுதியில் திராட்சை அதிகமாக செய்கை பண்ணுகிறார்கள் . பூமலரின் வீட்டிலிருந்து பத்து கிலோ மீற்றருக்குள் இருக்கும் . அதிக தூரத்தில் இல்லை. விரைவாக திராட்சை தோட்டத்துடன் இருந்த உணவகத்தை அடைந்து விட்டார்கள் . லொப்ஸ்டர் கடலுணவு போட்ட சவுடார் சூப் , சன்விச் ..என எடுத்து டிசெர்ட்டும் எடுத்து சாப்பிடுகிறார்கள் . திராட்சை தோட்டத்தில் இறங்கி படங்களையும் எடுத்துக் கொண்டு நடக்கிறார்கள் . சீமேந்து தூண்களிட்டு வரிசை , வரிசையாக பந்தலிடடிருக்கிறார்கள் . திராட்சை பச்சைக்காய்களுடன் கிடக்கின்றன . கீழே சரிந்து கொண்டு போகும் நிலக்காட்சிகளையும்...பார்க்க முடிகிறது .
ஈழத்தில் சுயமாக மாகாணவரசு நிலவுமானால் வடமராட்சி வைன்கள் இந்நேரம் இங்கிருக்கும் வைன்களுடன் போட்டி போட்டுக் கொண்டிருக்கும் . சுழியர்கள் நிச்சியமாக செய்திருப்பார்கள் . வலிகாமம் , தென்மராட்சிப் பகுதிகளில் திராட்சை அவ்வளவாக செய்கை பண்ணப் படவில்லை . மண்தான் காரணமாக இருக்கும் என நம்புகிறான் . படித்த மாணவர் திட்டத்தில் அவன் வயயொத்தவர்கள் ...வடமராட்சியில் திராட்சையில் ஈடுபட்டதை வியப்போடு பார்த்திருக்கிறான். அவர்கள் எப்பவும் துணிச்சல் மிக்கவர்கள் தான் என்று சொல்லப்படுகிறது .
இன்று , அநாகரிக அரசால் எல்லாமே அழித்து சிதைக்கப்பட்டிருக்கிறது . மீண்டும் அது உயிர் பெறுமா ? ...பட்ட மரம் தளிர்க்குமா, தழைக்குமா? ஏக்கமாக கிடக்கிறது . மழைக் குணமாக இருந்தது . அதோடு வீடு திரும்பி விட்டார்கள் . அவனுக்குத் தான் பொன்னியின் செல்வன் புத்தகம் இருக்கிறதே . பூமலருக்கும் , ஜெயந்திக்கும் கதைக்க நிறைய விசயங்கள் இருந்தன .
தேவாலயங்கள்
அவர்கள் அடுத்த நாள் 'ஹைவே ஒன்'னிலே (லோக்கல் கைவே இலக்கம் ஒன்று வீதீ ) ஓடி இயற்கைக் காட்சிகளையும் , சிறு டவுண் போன்ற குடியிருப்புகளையும் பார்த்துக் கொண்டு டிக்பியைத் தாண்ற போது , பூமலர் " கடலில் இங்கேயும் திமிங்கிலங்களைப் ( கடல் ராஜாக்களைப் ) பார்க்க கூட்டிச் செல்கிறது இருக்கிறது " என்கிறாள் . தொடர்ந்து " இதிலே மனிதச் செயற்பாடுகள் எதுவும் இல்லை . தூர தள்ளி நின்று பார்த்தால் பறவைகள் கூட நம்மை மரம் என்று நினைத்து வந்து எம்மேல் அமரும் அல்லவா .அது போல திமிங்கிலமும் ...மனிதர்களை பொருட் படுத்துவதில்லை . இயற்கை ஆர்வலர்களின் குரல்கள் இங்கே ஒன்றும் ஒலிப்பதில்லை . எப்படி அந்த உருப்படி உடலை தூக்கி நீருக்கு மேலாக பாய்ந்து குத்துக் கரணம் போட்டு உடலை புரட்டி விளையாடுகின்றன . ஆச்சரியமாக இருக்கும் " என்கிறாள் . ஆள்களைக் கொல்கிற திமிங்கிலம் பற்றி தான் அவன் கதை , கதையாகக் கேட்டிருக்கிறான் . இங்கே அபாயமற்றவையாய் இருக்கின்றனவே . சுறாவையே பயங்கர கடல் மிருகமாக கூறப்படுகிறது . அதில் , முலையூட்டியும் , முட்டையிட்டு குஞ்சு பொறிக்கிறவையும் இருக்கின்றன . மொத்ததில் அவை எல்லாமே கெட்ட சுறா தான் . இயற்கை எத்தனை சுவாரசியமான பாடங்களை வைத்திருக்கின்றது .
அப்படியே சென்று ஒரு தேவாலயத்தை அடைந்தார்கள் .
பத்து வருடங்களாக பொறுமையுடன் ஒவ்வொரு கற்களாக கொண்டு வந்து கட்டிய சாதனை தேவாலயம் அது . " கோயில் இல்லா ஊர் பாழ் " என்கிற இந்து க்களைப் போல பிரெஞ்சுகாரர்களும் முதலில் ஒரு பெருங்கோவிலைக் கட்டி , பிறகு அதைச் சுற்றி க் குடியிருப்புகளை எழுப்புகிறார்கள் . சொந்த நாட்டில் எழுப்புறது நல்ல விசயம் . ஆனால் , அன்னிய மண்ணைப் பிடிக்க எழுப்புறது நெஞ்சை நெருடுகிறது . நீளகாலம் எடுததிற்கு ...எதிர்ப்புக்கள் பலமாக இருந்ததே இருக்கலாம் . குருக்கள் கொல்லப்பட்டால் ..அவ்விடத்திலேயே உடலை புதைத்து புனிதர்களாக்கி ...விட்டு பலமாக நிற்பதே தொடர்கிறது . ஜெயந்திக்கும் , பூமலருக்கும் கோயில்களை பார்ப்பதில் கொள்ளை ஆசை . தில்லைக்கு அதன் கட்டிடக்கலையைப் பார்ப்பதில் விருப்பம் . நேரம் . திருத்த வேலைகளுக்காக மூடப்பட்டிருந்தது . எனவே வெளிப்புறத்தில் நின்று கோயிலோடு .'.கிளிக்'குகளை தட்டினர் . செல்போன் கமரா காவுறதை இல்லாமல் செய்திருக்கிறது . கத்தோலிக்கர்கள் அழகிய சிலைகளையும் கோவிலைச் சுற்றி நிறுத்தி விடுகிறவர்கள் . யேசு நாதர் பேசுகிறார் . அவருடைய மலைப் பிரசங்கம் தான் பிரபல்யம் . அக்காட்சியாய் தான் இருக்கும் . " ஒரு கன்னத்தில் அறைந்தால் , மறு கன்னத்தையும் காட்டு " . யேசுநாதர் கூறியது தான் . காந்திக்கும் பிடித்த வசனம் . காந்தி கூறியதில்லை .
" இன்னொன்று முழுக்க மரத்தால் கட்டப்பட்ட பெருங்கோவில் இருக்கிறது . அது திறந்திருக்கலாம் .உள்ளே என்ன அழகான ஓவியங்கள் எல்லாம் வரைந்திருக்கிறார்கள் . ஒரு தடவை பார்த்திருக்கிறேன் " என்றாள் பூமலர் . அதே வீதியில் மேலும் ஓடினோம் . போற போதே ஜெயந்தி செல்லில் குகூகிளில் பார்க்க , அதுவும் திருத்த வேலையில் மூடப்பட்டிருக்கிறது . கனடாவிலே முதலில் மரத்தால் எழுந்த தேவாலயம் அது தான் . " இது , எழுதப் படிக்கத் தெரியாத ஒரு ஐரோப்பியரின் தலைமையிலே பல ஆண்டு காலம் எடுத்து கட்டி முடிக்கபட்டிருக்கிறது " என்கிறாள் . பாடம் படியாத மேதைகளும் உண்டு . அதிலும் நின்று...பல ' கிளிக்' குகள் .
திரும்பி வரும் போது " இங்கே தமிழ்ச் சனம் குறைவு . சைவக்கோயில்கள் இல்லை என்றே கூறலாம் . ஒரு குரோசரி கடை கலிபஸில் திறந்திருக்கிறார்கள் . இங்கே இருப்பவர்கள் எப்பவும் குழுவாகச் சேர்ந்து பார்ட்டி போல ஒன்று கூடுகிறார்கள். பொட்லக் பார்ட்டி . ஒவ்வொருவரும் ஒவ்வொரு கறிகளைச் சமைத்துக் கொண்டு வருவார்கள் . கோடை காலத்தில் காய்கறி பயிரிடுகிறார்கள் . விளையிறதை பகிர்ந்தும் கொடுக்கிறார்கள் . அப்படித் தான் நாம் பழகிறோம் " என்றாள் பூமலர் . இங்கே பூமலருடன் படித்தவர்கள் சிலர் வீட்டிலே தோட்டமும் போட்டிருக்கிறார்கள் . மிதவெப்பநிலை கொண்ட தீவு . வளமிக்கமண்ணைக் கொண்ட அனபொலிவலிப் பிரதேசம் . மழை அதிகமாக பெய்கிறது . நல்லபடியாய் விளைகிறது . விவசாயம் செய்த அனுபவமுள்ளவர்கள் வெற்றிகரமாகவே இங்கே , என்ன..... , கனடாவில் எந்த பகுதியிலுமே ஜீவிக்கலாம் . பூமலர் குளிர்பெட்டியில் , உறைப்பகுதியில் காய்கறிகளை கழுவிப் போட்டு வெட்டி சிறிய பைகளில் போட்டு வைத்திருக்கிறாள் . எடுத்து , எடுத்து சமைக்கிறாள் . " சித்திராவும் சுமியும் ரொரொன்ரோவிற்கு போய் விட்டால் எனக்கு இப்படி இருக்கிறதே போதுமானதாக இருக்கிறது " என்கிறாள் . வாட்ஸப்பும் , முகநூலும் அவளுக்கு பெரிதும் உதவுகின்றன .
கையோடு கொண்டு வந்த தேனீர் ,சிப்ஸ் , சன்விச் எல்லாம் முடித்திருந்தார்கள் .
வீட்டிற்கு வந்த பின் பூமலர் தோசை சுட்டாள் . ஜெயந்தி கறி ஒன்றைச் செய்தாள் . குளித்து சாப்பிட்ட பிறகு , தில்லை , தொலைக்காட்சிப் பெட்டி வைத்திருக்கிற ஒபீஸ்ரூம்க்கு வந்தான் .அங்கே இருந்த பெரிய கவுச்சிலே(கதிரை) இருந்து கொண்டு பொக்ஸ் சனல்களை தட்டி , தட்டி பார்த்தான் . ரொரொன்ரோ சனல்கள் வட்டம் போட்டுக் கொண்டிருந்தன . சலிக்க ...அதற்கொரு குட்பை . அறவே துண்டித்திருப்பது நல்லாயிருப்பது போலவும் தோன்றியது . " கரபானா " எல்லாம் முடிந்திருக்கும் . அங்கத்தைய பரபரப்பு தலையிடிகள் , தினமும் சுட்டுச் செய்திகள் ....என ஒன்றும் இல்லை . வீடு எரிந்து அதில் சாகிற துயரச் செய்திகளும் இல்லை . பிரிட்டனில் ஒரு தமிழ்க் குடும்பம் எரிந்த பிறகு , ஒரு கிழமை வரையில் தொடர்ந்து கேட்டு வந்தான் . ரொரொன்ரொ நகரிலே தினமும் ஒரு வீடு எரிந்தது . சிறுவர்களும் , கூட தாயோ , தந்தையோ ... இறக்கிறார்கள் . மனது பெரிதா வலித்தது . அரசுகளிற்கு ...சாக்களைக் குறித்து அக்கறை இல்லை . பழங்குடியினரின் சாக்களும் அப்படியே கரைந்து போய்க் கொண்டிருக்கிறது . இலங்கைச் சிங்களவர் கலவரத்தில் நிகழ்த்திய கொடுமைகளை மறுபடியும் பார்க்கிறோம் . சபிக்கப்பட்டவர்கள் எல்லா இடங்களிலும் இருந்து கொண்டு தானிருக்கிறார்கள் . நாம் போராட வேண்டியது ஒட்டுமொத்த மக்களுக்காவும் தான் . எமது விடுதலைப் போராட்டத்தில் கால் வைக்கிற போதே எம்மில் உள்ள அத்தனை மிருகங்களும் வெளிய வந்து விடுகின்றன . இயக்க மோதல் வலி நெஞ்சில் கிடக்கிறது . இவர்களுக்காக எப்படி போராடப் போறோம் ?
சாப்பாட்டு அறையிலிருந்து ஜெயந்தியும் , பூமலரும் கதைத்துக் கொண்டிருக்க மேலே இருக்கிற ரூமுற்குப் போய் பொன்னியின் செல்வன் பாகங்ககளை அள்ளிக் கொண்டு வரப் போனான் . பூமலர் " உனக்கு தேனீர் வேண்டுமானால் வந்து போட்டு எடுத்துக் கொண்டு போ " என்கிறாள் . சின்ன வயசில் அவளுக்கு குட்டு குட்டி பல தடவைகள் அழ வைத்திருக்கிறான் . அதை மறந்து விட்டு பாசமாக இருப்பாள் . இப்பவும் இருக்கிறாள் . படிகளில் ஏறியதில் அலுப்பு ஏற்பட ...மேல்தட்டு மூலையில் இருந்த சாமி அலுமாரியை , இதுவரை பெரிதாக கவனிக்கவில்லை நின்று பார்த்தான் . குட்டி , குட்டி யாக பல்வேறு நிலையில் தும்பிக்கையுடன் பிள்ளயார் சிலைகள் . படையாக நிற்கிறார் . பரம்பரை அலகு கோணல்மாணலாகிப் விகாரமாகிப் பிறந்தவர்களிற்கு வாழ்வில் ஒரு பிடிப்பை ஏற்படுத்த பிள்ளையார் கடவுளைக் கொண்டு வந்தார்களோ ? என்று அவன் நினைப்பவன் . அவன் அப்படி பலரைப் பார்த்திருக்கிறான் . பச்சாபப்பட்டிருக்கிறான் . கொழும்பு கொட்டகேனாவில் ஒரு பிச்சைக்காரன் " கடவுள் எல்லாருக்கும் சமமாகவே குறைகளை வைத்திருக்கிறான் . உனக்கும் ஒரு பெரிய குறை கிடக்கும் அதை ஒரு காலத்தில் உணர்வாய்" என்று கூறியதும் அவன் சாபம் இடுகிறானா? நினைத்தும் ஞாபகம் வந்தது .
அவனுடைய குடும்பத்திலும் யாரோ ஒருவர் ஒவ்வொரு காலத்திலும் பிள்ளையார் விசிறிகளாகவே இருந்திருக்கிறார்கள் .
சின்ன வயசில் பெரியக்கா பிள்ளையார் பக்தை . வீட்டின் பக்கத்திலிருந்த பன்றிகொட்டுப் பிள்ளையார் கோவிலுக்கு நித்திய பூஜைக்கு தவறாமல் போய் வருவார் ." பிள்ளையார் , பிள்ளையார் ...பெருமை வாய்ந்த பிள்ளையார் " பாடலையும் பாடுவார் . அதற்கு முந்தி சின்னம்மா ...இருந்தார் . கோவிலே கங்கைவேணி நிற்பதும் நினைவில் வந்தது . இவன் , தங்கச்சி போற போது மோதகம் , அவல் , பொங்கல் ... இப்படி ஏதாவது ஒன்றை தருகிற அண்ணர் . இப்ப தங்கச்சி . பிள்ளையார் அதிசயமான கடவுள் தான் . வட இந்தியாவிலிருந்த சமணர்கள் தான் எல்லா தெய்வங்களையும் பிறக்க வைத்தவர்கள் . வாதாபிக் கணபதி என அவர்கள் தொழ ...பிறகு சைவக்கடவுளாகவும் பீடமேறினார் . இவனும் பிறகு தொழப் போறான் . ரொரொன்ரோ திரும்பிய பிறகு , அண்மையில் , கங்கை அமரன் எழுதிய வாழ்வின் நினைவுகள் பற்றிய ஒரு நூலை வாசித்திருந்தான் . அதிலே , " அண்ணர் ஒவ்வொரு நாளும் காலையிலும் சாமிப்படத்திற்கு முன்னால் நின்று கும்பிட்டு விட்டே காரியங்களை ஆரம்பிப்பார் . அவரைப் பார்த்து நானும் பழகி விட்டிருக்கிறேன் . சிறிது பாதகமாக நடைபெற்றிருந்தாலும் மனசு உடைந்து போகாமல் ஏற்றுக் கொள்கிறது . நன்மையாய் தான் இருக்கிறது " என்கிறார் . அன்றிலிருந்து பூமலர் கும்பிடுற பிள்ளையாரை இவனும் ,( பூமலர் , ஜெயந்திக்கு கொடுத்திருக்கிற பிள்ளையார் சிலையை) களவாக கும்பிட்டு வாரான் . ஏதோ ஒரு சக்தி காப்பாற்றும் என்ற நம்பிக்கை . இல்லா விட்டாலும் பரவாயில்லை . அவன் கும்பிடுற புண்ணியம் தங்கச்சிக்கு போய்ச் சேரட்டும் .
புத்தகங்களை எடுத்துக் கொண்டு திரும்பினான் .
[தொடரும்]
இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.